Den 18.5.2005 inviterte vi til å kome med forslag på nynorske ord for i alt 90 ulike golford, alle henta frå elevheftet "Veien til Grønt kort", utgitt av Norges Golfforbund. No har ein eigen jury plukka ut dei beste orda.
Vinnarar
Juryen har premiert forslaga i stort alvor og med glimt i auga. Vi har lagt vekt på funksjonalitet og at orda er meiningsberande og klargjerande, og teke omsyn til at nokre uttrykk alt er godt innarbeidde i munnleg form.
Beste samla forslag
Ingebjørn Røren, Ulsteinvik, for grundig arbeid og mange godt gjennomtenkte forslag, blant anna LAUSTORV for DIVOT og SLAGLENGD for CARRY.
Rett-i-holet-prisen
Delt mellom Ingebjørn Røren, Ulsteinvik, og Torfinn Slettebø, Skulestadmo, for RETT-I-HOLET for HOLE-IN-ONE.
Pro-prisen
Asbjørn Ramnefjell, Østerås, for at ein av dei mest rutinerte og meritterte golfspelarane i landet stiller opp og viser at språk er viktig også i idretten, og for gode forslag som STILLE SEG OPP for APPROACH.
Det enkle er det beste-prisen
Rune Strømmen, Volda, og Ingebjørn Røren, Ulsteinvik, for GRASGAFFEL for GREENGAFFEL
Rekrutteringsprisen
Marit Halse, Oslo, for mange gode forslag og teft for både språk og golf
Heiderspris utanfor konkurransen
Amund Ekroll og hans medspelarar i Colorado, USA, for utvikling og bruk av norske golford over lang tid i USA, og for fulltreffaren GRØNNA.
Komplett golfordliste
Ut frå dei forslaga som er komne inn, kan det no lagast ei nesten komplett norsk golfordliste. Kva ord som glid inn i daglegtalen, kan likevel ikkje ein jury avgjere åleine. Konkurransen har vist at både golf og andre idrettar kjem langt på norsk. Vi vil gjerne stimulere interessa for norske golford og for golfsporten, og publiserer difor ordlista her.
Det kan vere særleg interessant å få fleire forslag til ein del ord som står i forhold til kvarandre og heng saman, så som birdie-eagle-albatross, draw-fade og hook-slice.
Vi har blinka ut nokre ord som vi meiner bør gå rett inn i golfspråket, og så oppfordrar vi golfspelarar både i inn- og utland om å følgje opp og kome med nye forslag. Om eitt år håpar vi Dei nynorske golfspela kjem att!
Helsing juryen
Ottar Grepstad (Nynorsk kultursentrum, juryleiar), Jostein Digernes (Volda Golfklubb), Halvor Kleppen (Norsk Golf) og Ålov Runde (Norsk Ordbok 2014).
(04.07.05)
