I år er det 100 år sidan den folkekjære diktaren Jakob Sande blei fødd. Dei Nynorske Festspela markerer dette med tre forskjellige program der ein ser på fleire sider av Jakob Sande si dikting. Med ulike aktørar presenterer Festspela Sande for born, Sande i kyrkja og Sande til sjøs.
Barneframsyninga torsdag 22. juni tar utgangspunkt i Jakob Sande sitt dikt ”Fabel” om Gåsa, katten og hanen. Ingunn Elida Wiken har nyleg gitt ut ei bok med nye fargerike og fantasifulle teikningar til dette Sande-diktet. I ord, tonar og bilete blir vi med Gåsa, katten og hanen på ei reise til kongen i København medan vi sit trygt i amfisalen i Aasen-tunet. I samband med dette arrangementet blir det også tre- og tekstilverkstad, der borna mellom anna får lage sin eigen hane i tre.
Sande i kyrkja
Jakob Sande laga tekstar om både høgt og lågt. Om kvelden torsdag 22. juni møter vi den meir høgstemte Sande i kyrkja. Det er mange som har tonesett dikta hans, mellom anna kantor i Ørsta kyrkje, Roar Goksøyr Lillebø. Saman med Ørsta kyrkjekor og opplesaren Svein Havåg vil han gi publikum ei minnerik stund der vi får oppleve noko av det spennet som finst i Jakobs Sande si dikting. Tre dikt blir presenterte i heilt ny tonedrakt denne kvelden.
Avslører løyndomar om Jakob Sande midtfjords
Jonsokaftan kan du reise med Jakob Sande på ferje frå Ørsta til Volda. Normalt går det ikkje ferje inn Ørstafjorden, men Festspela gjentar suksessen frå i fjor og fraktar både publikum, musikarar og andre aktørar fjordvegen mellom bygdebyane. På M/F Geiranger får du mellom anna oppleve Sande-biograf Ove Eide som presenterer nye og avslørande opplysningar om Jakob Sande. Eide kjem med sin biografi om Sande til hausten, men han har lova å sleppe ein del godbitar til festspelpublikummet på denne eksklusive ferjeturen.
Gruppa Aftenlandet debuterte på CD med tekstar av Jakob Sande for ti år sidan. Etter det har det blitt fleire CD-ar og mykje radiospeling. Ferjeturen blir deira første møte med Sunnmøre som konsertarena, og det med fjord og fjell som bakteppe. Aftenlandet kjem til å spele både frå Sande-repertoaret sitt og andre songar som dei har blitt kjende for.
Volda Vokal hadde stor suksess med sin Sande-konsert tidlegare i vår, og dei vil presentere smakebitar frå dette programmet på ferjeturen frå Ørsta til Volda.
(14.06.06)
