Dei nynorske festspela blei opna torsdag kveld av kulturminister Anniken Huitfeldt. Ho framheva at dette er ein viktig festival og ein av dei få som lykkast med å krysse dei mange sjangergrensene mellom litteratur, språk, musikk og biletkunst.

             

På ei rekkje av arrangementa framførte forfattarar, musikarar og fagfolk originalstoff som ingen før hadde høyrt. Festspela kunne by på artistar som song på norsk for første gong, plateslepp, originalforedrag som berre blir framførte denne eine gongen, nyskrivne tekstar og bøker som enno ikkje er publiserte.

 

Programmet gjekk frå morgongymnastikk med festspeldiktaren til opning av naust, og frå kunstutstilling med bruksgrafikk der Ivar Aasen er motivet til debatt om nynorsk som underhaldningsspråk. Kringkastingssjef Hans-Tore Bjerkaas utfordra i eit foredrag journalistutdanningane rundt om i landet til å rekruttere fleire nynorskbrukande journalistar.

                       

I tillegg til færre arrangement og arrangementsdagar blei Dei nynorske festspela avvikla på færre stader enn før. Mest brukt var utescena og salen i Ivar Aasen-tunet. – Det gjorde det lettare å vere festivalgjest og skape ei roleg, intens festivalstemning, seier Widerøe. Spennet i programmet blei tydelegare fordi så mange ulike arrangement var på dei same scenene, og den unike utescena i Aasen-tunet var i bruk til store konsertar kvar kveld.

 

Dei to første dagane regna det mykje, men det fekk lite å seie. Både torsdags- og fredagskvelden var 250 med på regnfylte utekonsertar i Aasen-tunet. Etter familiekonsert i silregn med den unge artisten Malin stod fans i signeringskø i ein halvtime. 

           

Festspeldagane såg fleire hundre festspelutstillinga med bruksgrafikk frå samlinga til Jostein O. Mo. Denne utstillinga blir ståande til 3. september. Ei ny temautstilling om noveller blir vist like lenge. Det er første gongen nokon i Noreg har laga ei utstilling om det emnet.

 

Kvart år har utøvarane vore begeistra for publikummet under Dei nynorske festspela. – Det rører utøvarane å møte eit så lydhøyrt og innsiktsfullt publikum, og endringane i år berre forsterka denne kjensla, meiner Åshild Widerøe. Ho gler seg også over at fleire frivillige blir med frå år til år og at mange unge kjem og vil vere med.

Det er Nynorsk kultursentrum som arrangerer Dei nynorske festspela. – God økonomisk styring, jamt høg kunstnarleg kvalitet og eit program der alle kan finne noko som interesserer dei, er dei tre krava som gjeld for Dei nynorske festspela, seier direktør Ottar Grepstad.   

 

I år var måla å auke eigeninntektene og sikre det økonomiske grunnlaget for Dei nynorske festspela, og samstundes utvikle vidare det kunstnarlege og faglege innhaldet. Grepstad meiner desse måla er nådde. Billettsalet auka med 25 % frå 2009, omsetninga i kafeen og butikken i Ivar Aasen-tunet var svært god, og Grepstad kjenner seg trygg på at kostnadene har vore under kontroll. Førebels rekneskap er klar i september.