Cecilie Jørstad er ein skodespelar med mange stemmer. Ho gestalter enerverande Hollywood-karakterar på Disney Channel, men like naturleg framfører ho dikt varmt og inderleg, som helsebot for øyre og sinn. Sist ho var på Dei nynorske festspela las ho dikt av Lars Amund Vaage saman med Tord Gustavsen. Laurdag 26. juni kjem ho tilbake til Ivar Aasen-tunet for å framføre ønskedikta til årets festspeldiktar Rønnaug Kleiva.

 

Kleiva har til dette programmet gjort eit utval av dei dikta ho set mest pris på. Lyrikken til Eldrid Lunden er sjølvsagt i dette utvalet. Lunden debuterte i 1968 med diktsamlinga f.eks. juli, og er ein nyskapande poet i moderne norsk lyrikk. Ho skriv nedtona og presise dikt, blir det framheva på nettleksikonet Allkunne.

           

Av utanlandske lyrikarar festspeldiktaren vil dele med oss, finn vi Robert Bly og Raymond Carver, gjendikta av høvesvis Olav H. Hauge og Tor Obrestad. Vidare får vi møte dikt av svenske Thomas Tranströmer; han som skriv så godt at Rønnaug Kleiva bestemte seg for å slutte å skrive dikt; hennar dikt kunne aldri måle seg med hans. Festspeldiktaren treng ikkje få rett i den påstanden, men det blir spennande å få høyre dikt som ho set så høgt.