Det finst tusenvis av språk, og Rolf Theil veit mykje om dei.
Det handlar om dei store språka og enkeltmenneska når Rolf Theil og Oddgeir Bruaset kjem til Dei nynorske festpela.
Søndag 27. juni møter vi formidlaren Bruaset og språkeksperten Theil i to påfølgande arrangement i salen i Aasen-tunet.
Offisielt bur det om lag 11 millionar menneske i den brasilianske verdsbyen Säo Paolo. Korleis har det seg at ein million av dei snakkar japansk? Og kor kinesiske er dei mange bydelane i USA som blir kalla Chinatown? Slike spørsmål risikerer publikum å få svar på like etter kyrkjekaffien søndag. For fjerde gong er språkvitaren Rolf Theil på Dei nynorske festspela med si entusiastiske og svært innsiktsfulle formidling av store linjer og små kuriosa om all verdas språk. Dette er ikkje ein time om dei gamle kolonispråka. Det blir heller ein time om koloniar av språk verda rundt. – Eg har alt byrja å gle meg, sa Theil i april.
Journalisten som lyttar
Som journalist har Oddgeir Bruaset nådd uvanleg langt ut til fjernsynssjåarar i Noreg. Vi har alle sett det: Dei glidande bileta av norsk natur, akkompagnert av naturmytisk musikk, og den rolege røysta til Bruaset som fortel om menneske som har teke eit anna val enn dei fleste av oss. Det heile går føre seg i eit tempo som står i kontrast til mykje anna programinnhald i dag. Kunne ein ha vore meir i utakt med tida? Søndag får du svar på kva løyndomen bak formidlingssuksessen til Oddgeir Bruaset er, når han samtalar med Audhild Gregoriusdotter Rotevatn i Ivar Aasen-tunet.
Nynorsk kultursentrum tek frå nyttår over ansvaret for å etablere, utvikle og drive Olav H. Hauge-senteret i Ulvik i Hardanger. Det er klart etter at styra i Olav H. Hauge-stiftinga og Nynorsk kultursentrum samrøystes har godkjent ein avtale om samanslåing.
– Pressa har vore viktigare enn forlaga i utviklinga av nynorsk skriftkultur. Det er ein av konklusjonane til Ottar Grepstad i den nye boka Avisene som utvida Noreg som Samlaget gir ut i haust.
