– Å lese Den nynorske songskatten er som å vere på konsert og høyre framståande musikarar framføre noko som lyfter ein ut or kvardagen, skreiv Dag og Tid sin meldar om den siste boka til Terje Aarset.
Den nynorske songskatten tek for seg historia til femten av dei mest folkekjære nynorske songane, frå ”Blåmann” til ”Det lyser i stille grender”. Det ligg eit grundig og langsiktig detektivarbeid bak omtalane av kvar enkelt song, boka byggjer nemleg på artiklar som Terje Aarset har skrive i løpet av dei siste tretti åra.
Aarset har lagt stor vekt på å presentere både tekstene og tonane til songane. – Eg har særleg prøvd å få fram samspelet mellom tekst og tone og ”kappestriden” mellom tonane fram til sjølve tonen eventuelt rår grunnen åleine. Samstundes har eg lagt vekt på å gjere greie for korleis eg har funne fram til dei opplysningane eg legg fram. Stundom er vegen like spennande som målet, skriv Aarset i føreordet til boka.
Den nynorske songskatten er både ei oppslagsbok, eit rikt faglitterært kjeldeskrift og spennande lesnad for alle som har interesse for norsk folkesong. På søndag får heile møtelyden vere med i allsong på fleire av desse songane. Magnar Åm spelar piano, Siv Kristin Aurdal er forsongar og syng i tillegg solo på nokre songar.
Terje Aarset er førsteamanuensis i norsk språk ved Høgskulen i Volda. Han har redigert og gjeve ut ei rekkje bøker innanfor emna språk, litteratur, bibliografi, lokalhistorie og musikk. Aarset er aktiv musikar og arrangerer musikk, særleg for kor.
– Her har vi årets nynorske bok! Det er i alle høve lenge sidan eg har fått noko så gildt, kveikjande og interessant i hende, og eg trur ikkje eg er så spesielt skrudd i hop at ikkje mange, mange andre vil oppleve det på same viset, skreiv ein begeistra Bjørn Kvalsvik Nicolaysen i Dag og Tid.
SØNDAG 22. NOVEMBER 15.00 Salen, Ivar Aasen-tunet
Den nynorske songskatten
Kr 100
(17.11.09)
