Der les ho frå bøkene sine og samtalar med direktør Ottar Grepstad. Arrangementet er eit samarbeid med Bjørnsonfestivalen som opnar i Molde onsdag 26. august.
El Saadawi sa i eit intervju med Dag og Tid i vår at ho er ikkje eit fredeleg menneske. Ho har både eit fagleg og eit litterært blikk på det som skjer i Midtausten, og veit nok meir om kulturelle motsetnader og vilkåra for kvinner i ulike kulturar enn nordmenn flest. Ho tenkjer skarpt og skriv godt, og eg vonar samtalen kan vere med og rydde i den norske debatten om kulturell og språkleg integrering, seier Ottar Grepstad.
Vann rettssak
Nawal El Saadawi er fødd i Egypt i 1931, og er utdanna som lege og psykiater. Ho har skrive meir enn 40 bøker i ein forfattarskap som strekkjer seg frå noveller og romanar til skodespel og sakprosa gjennom meir enn 50 år. Berre to bøker er omsette til norsk: ”Firdaws – kvinne på nullpunktet” (1984) og ”Imamens fall” (1991).
Den politiske aktivismen til El Saadawi førte i si tid til at ho blei oppsagd frå stillinga si i Helsedepartementet i Egypt. I 1981 sat ho også fengsla nokre månader. I 2007 saksøkte den øvste religiøse institusjonen i den islamske verda henne for eit skodespel ho hadde skrive. Det blei også kravt at alle bøkene hennar skulle bli forbodne i Egypt. El Saadawi vann rettssaka og vender no tilbake til heimlandet etter to år i USA. Også i åra 1991–96 var ho i eksil i USA, då etter trugsmål frå islamske aktivistar.
Nawal El Saadawi er president for Den arabiske kvinnesolidaritetsorganisasjonen, som ho sjølv skipa i 1982.
Raust samarbeid
Nawal El Saadawi er festivalforfattar under Bjørnsonfestivalen 2009. Dette er andre året Ivar Aasen-tunet og Bjørnsonfestivalen samarbeider om forfattararrangement. I fjor gjesta André Brink dokumentasjons- og opplevingssenteret for nynorsk skriftkultur i Ørsta. – Hege Newth Nouri i Bjørnsonfestivalen har raust bydd opp til samarbeid, og vi er svært glade for at dei to institusjonane får til slike arrangement, seier programansvarleg Åshild Widerøe.
MÅNDAG 24. AUGUST 19.00 Salen, Ivar Aasen-tunet
Nawal El Saadawi
Arrangementet er på engelsk
I samarbeid med Bjørnsonfestivalen
Kr 100 / studentar gratis
(17.08.09)
