Vaage er den femtande forfattaren som får oppdraget som festspeldiktar. Dei Nynorske Festspela har vore arrangerte i Ørsta og Volda kvart år sidan 1992. Neste år tek dei til i Ivar Aasen-tunet onsdag 25. juni og sluttar søndag 29. juni. Festspela blir arrangerte av Nynorsk kultursentrum.
Festspeldiktaren blei presentert under ei tilstelling på Ivar Aasens 194. fødselsdag i Ivar Aasen-tunet søndag. – Eg vil gjerne at bøkene mine skal vere vakre, sa Vaage. – Musikken er ei stor sak for meg. Det er som eg spelar når eg skriv, og eg trur det er noko songbart ved bøkene mine, sa Vaage etter at han hadde spelt eit preludium av J.S. Bach på flygelet i Aasen-tunet.
Kva Lars Amund Vaage skal gjere under Festspela neste år, blir fastlagt utover hausten og vinteren. – Publikum skal nok få både det dei ventar og noko som overraskar, seier programansvarleg Åshild Widerøe. – Søndag viste denne framifrå forfattaren at han er ein meir enn habil pianist også, og som festspeldiktar skal Vaage prege programmet slik Erna Osland gjorde i år. Dermed blir Festspela ganske ulike frå år til år, seier Widerøe.
Lars Amund Vaage er fødd på Sunde i Sunnhordland i 1952. Han debuterte i 1979 med romanen Øvelse Kald vinter. Han har skrive 15 bøker; romanar, noveller, skodespel, barnebøker og diktsamlingar. I 1995 fekk han Kritikarprisen for romanen Rubato, som han også blei nominert til Nordisk Råds litteraturpris for, og i 2002 vann han P2-lyttarane sin romanpris for Kunsten å gå. Vaage har fått ei rekkje andre prisar og blir rekna som ein av dei aller fremste og mest kresne stilistane i norsk samtidslitteratur.
Festspeldiktarar 1994–2008
1994: Kjartan Fløgstad
1995: Halldis Moren Vesaas
1996: Paal-Helge Haugen
1997: Ragnar Hovland
1998: Jon Fosse
1999: Åse-Marie Nesse
2000: Rune Belsvik
2001: Brit Bildøen
2002: Einar Økland
2003: Marie Takvam
2004: Frode Grytten
2005: Edvard Hoem
2006: Olaug Nilssen
2007: Erna Osland
2008: Lars Amund Vaage
(06.08.07)
