Parr syner kva som er mogleg og at mykje må gjerast i i norsk litteraturpolitikk for å utvikle meir godt lesestoff for born og unge på nynorsk, seier styret i Nynorsk kultursentrum i si grunngiving for tildelinga.
Prisen på 50 000 kr blir delt ut under opningshøgtida for Dei nynorske festspela 24. juni.
Ein kulturpolitisk pris
– Dette er ein kulturpolitisk pris, seier direktør Ottar Grepstad i Nynorsk kultursentrum. – Maria Parr er ein fenomenal forfattar som alt har fått mange velfortente litteraturprisar for bøkene sine. Med denne prisen peikar vi på det litteraturpolitiske alvoret i at born og unge manglar lesestoff på nynorsk, medan landet fløymer over av litteratur på bokmål både i trykt og digital form. Det Maria Parr gjer, kan ikkje overvurderast, seier Grepstad.
Nynorsk kultursentrum har i fleire år arbeidd mykje med nynorsk barnekultur og lesestoff for born og unge. Emnet blei mellom anna drøfta i årstalane om tilstanden for nynorsk skriftkultur både i 2008 og 2009. Tunkatten Lurivar med nettstaden tunkatten.no er blitt ein populær figur, og grunnforteljinga om tunkatten var det Maria Parr som skapte. I 2006 gjekk Nynorsk kultursentrum inn som medstiftar i Rasmus Løland-markeringa 2007–2011 for å styrkje nynorsk barnelitteratur. Nynorsk kultursentrum er også med i fagrådet for barnebokfestivalen Falturiltu på Stord.
Den fremste nynorskprisen
Nynorsk kultursentrum har kåra Årets nynorskbrukar sidan 2000. Prisen blir tildelt personar eller institusjonar som har synt evne til å bryte med språklege og kulturelle konvensjonar om bruk av nynorsk, som gjennom sitt føredøme eller praktiske arbeid gjer det lettare å vere nynorskbrukar, eller som skaper større allmenn forståing for nynorsk.
Årets nynorskbrukar blir no rekna som den fremste nynorskprisen. På lista over tidlegare prisvinnarar står både ein høgsterettsdomar, hotelldirektør og ein lege, fleire redaktørar og ein heil skule. Maria Parr er den første forfattaren som får prisen for det skjønnlitterære arbeidet sitt.
Årets nynorskbrukar 2000–2010
2000 Høgsterettsdomar Karl Arne Utgård
2001 Hotelldirektør og visepresident i NHO, Gerd Kjellaug Berge
2002 Ringstabekk skole, Bærum
2003 Redaktør Martin Toft
2004 Musikkgruppa Side Brok
2005 Forfattar Kjartan Fløgstad
2006 Forretningskvinne og toppidrettsutøvar Kari Traa
2007 Forlagsredaktør Guri Vesaas
2008 ÅmliAvisa v/redaktør Inger Stavelin
2009 Seksjonsoverlege Ottar Rekkedal
2010 Forfattar Maria Parr
(08.04.10)
