Visste du at kjevle som blir liggande ubrukte og passive, kan kollapse totalt og bli til flatkjevle? Eller at kjevle som ligg tett saman og ventar kan klenge seg til kvarandre slik at det er uråd å lirke dei laus og få retta dei ut igjen? Dette og meir du ikkje visste om kjevla sitt hemmelege liv kan du sjå med eigne auge i utstillinga Kjælne kjevler og tomme hender.
Gjennom fleire tusen år har kjevle vore gode hjelparar for menneske over heile verda. Men kva skjer når dei ligg stua bort i skuffer og skap? Nokre einsame kjevle kollapsar og blir til slutt til flatkjevle, andre tøyer og bøyer seg og blir til tvikjevle, slik at dei i alle fall oppnår kontakt med sin eigen lengtande skrott.
Dei siste fem åra har stadig fleire uvanlege kjevle dukka opp i og utanfor hovudet til Hans Sande, der dei lever sine merkverdige liv. På denne utstillinga i Ivar Aasen-tunet kan du sjå mange slike skapnader og få eit levande inntrykk av kva som skjer når lengten etter gode hender blir for sterk. Dagleg leiar ved Volda bygdetun, Heidi Thöni Sletten, står for den offisielle opninga av utstillinga.
Hans Sande er forfattar og psykiater og har gitt ut 41 skjønnlitterære bøker. I det stille har han også arbeidd som biletkunstnar i alle år, men det er først med dette prosjektet han viser fram det han lagar for ålmenta. Same kvelden som utstillinga opnar, er Hans Sande også med på Boknatta i Aasen-tunet med si nyaste diktsamling, Heilt konge – dikt for unge og galne.
ONSDAG 11. NOVEMBER
19.30 Galleriet, Ivar Aasen-tunet
Kjælne kjevler og tomme hender
Utstillinga står t.o.m. søndag 29. november
Gratis opningsdagen, elles kr 30
(06.11.09)
